‘I he fakamatala Patiseti ‘o e ta’u ni, ‘oku ou fakaha ai ‘a e ngaahi founga ‘oku hoko atu ki ai e fakalelei ngaue ‘oku lolotonga fakahoko ‘e he pule’anga, pea fakaha ai foki mo e ngaahi taketi fo’ou ki he ta’u. ‘Oku fiema’u ke potupotutatau pea mo hu’ufataha ‘a e tokanga ke ngaue’aki ke matu’uaki ‘a e ngaahi palopalema fakatu’apule’anga pea pehe ki he ngaahi faingata’a fakalotofonua, kae malava ke a’usia ‘etau visone ki he kaha’u – ‘a e ngaahi taumu’a fakasosiale pea mo faka’ekonomika. ‘Oku kamata ‘a e patiseti ‘o e ta’u ni mo ha tu’unga ‘oku to e lahi ange ‘a e ngaahi palopalema, ka ‘i he taimi tatau ‘oku to e lahi ange e fiema’u hotau kakai: ngaahi fiema’u ‘a e to’utupu, kau vaivai, ngaahi famili ‘oku ‘ikai fe’unga ‘a e ma’u’anga pa’anga, kae tautautefito ki hotau kakai ‘i he ‘otumotu. ‘Oku ‘ikai totonu pea he’ikai ke tau lava ke tukunoa’i ‘a e ngaahi fiema’u ko ia. ‘Oku fai e feinga fakalukufua fou ‘i he’etau ngaahi tu’utu’uni pea pehe ki he ngaahi fakamole, ke feau e ngaahi fiema’u ni pea kau mai ki ai e ngaahi tokoni mei he ngaahi fonua fakalakalaka.
Category
Budget Statement
